DRAGON QUEST VII Reimagined

[長文慎入] 今日有款遊戲想介紹下，呢款遊戲由Square Enix同HexaDrive共同開發，繼3DS版本後，以現代技術開發製作嘅勇者鬥惡龍7第二個重製版本，「勇者鬥惡龍VII Reimagined」(以下簡稱勇者鬥惡龍為DQ)。坦白講玩完DQ123嘅HD-2D重製版後，得知下一部重製嘅作品唔係天空三部曲嘅456，反而係直接跳到去劇本篇幅最長、最受爭議嘅七代，老實講係有啲意外，基於六代嘅成功，令七代有住史無前例嘅期待，想當年七代一推出，評價相當兩極，鍾意嘅人話係神作，唔鍾意嘅人相當抗拒，如今DQ7終於以現代技術完全重製，未玩過原版嘅我又點可以錯過。 玩完之後，呢款遊戲真係好正，不論劇情定係角色都好吸引，傳統嘅回合製戰鬥系統配搭上轉職+兼職系統，感覺真係好好玩，收集地圖石板嘅過程都幾有趣，解謎部分相對簡單唔會話好困難，人偶風美術風格配搭上鳥山明嘅畫風真係好正，椙山浩一嘅唔少經典系列配樂都係咁好聽。今次嘅Reimagined將唔少原版被玩家詬病嘅內容都得以改進，遊戲節奏更明快、提示更清晰，更符合現代玩家嘅遊戲標準，玩呢款遊戲嘅各個部分，都可以充分感受到製作團隊嘅誠意，透過現代嘅技術令一種新玩家可以感受倒原版嘅魅力，呢款遊戲嘅整體表現我相當滿意，我自己都幾鍾意。 咁首先等我介紹下呢款遊戲嘅劇情啦，居住喺孤島「艾斯塔德島」嘅漁村少年，某日同摯友基法王子揾倒神奇地板嘅碎片，當佢哋將收集倒嘅碎片嵌入島上神殿嘅底座後，神秘嘅光芒引導佢哋前往全新嘅世界，每當佢哋拯救完一個世界或者解決嗰個世界嘅危機，返到原本嘅世界後，過去拯救嘅世界就會以新島嶼嘅形式出現，隨住劇情發展呢場只屬於幾個人嘅冒險之旅，逐漸被各種邪惡勢力介入，更一步一步揭露世界背後隱藏住嘅真相，咁到底漁村少年同佢其他同伴喺唔同世界中會遇到咩事？世界背後又埋藏住點樣嘅真相？如有興趣就自己買嚟體驗下啦。呢款遊戲嘅劇本我都幾鍾意，雖然DQ7都係勇者鬥魔王嘅故事，但敘事上對比其他系列作都算係幾特別，DQ7係以唔同嘅故事所組成，每個世界/島嶼都有個相對獨立完整嘅故事，每個島嶼嘅故事其實都幾短下，不過都無阻劇本嘅豐富度以及追看性，加上每個島嶼都有住唔同風格，玩嘅時候我總係會好期待下個島嶼會帶嚟點樣嘅故事。唔少系列粉絲都稱DQ7為系列最黑暗嘅劇本，DQ7嘅劇本確實相對現實同埋殘酷，每個島嶼故事嘅結尾未必有個好圓滿嘅結局，有機會係悲劇收場，呢點亦令DQ7同系列其他作品比較之下有住明顯嘅分別。遊戲前期唔同島嶼嘅嘅故事都看似毫無關連，遊戲中後期各種伏筆先將故事串連埋一齊，玩到最後故事嘅真相都令人幾驚喜。DQ7嘅一眾角色都充滿特色，加埋聲優們優秀嘅演繹真係冇得輸，玩嘅時候我都會好想知道佢哋嘅故事，例如漁村少年主角、追求自由嘅基法王子、漁村大小姐瑪莉貝兒、被狼撫養長大嘅狼少年賈波、立志完成族群使命嘅舞蹈家艾拉以及過去曾對抗魔王嘅老神兵梅爾文，至於本作嘅魔王歐爾格·德米勒戲份就唔算多，遊戲前期佢嘅事蹟就係靠文獻記載，不過憑住鮮明嘅個性以及獨特嘅造型，令佢成為DQ7其中一個最具代表性嘅角色。 而家等我介紹下呢款遊戲嘅玩法啦，喺呢片奇幻、未知嘅世界，玩家所操作嘅漁村少年一行角色需要從各地收集「石板碎片」，而收集足夠嘅石板碎片就可以嵌入神殿嘅底座，前往全新嘅世界，當解決嗰個世界嘅危機/問題，返到原本嘅世界後，石板中嘅世界就會以新島嶼嘅出現，而島嶼中嘅時間線就處於石板世界嘅未來，所以玩嘅時候我總係會好期待我喺過去(石板世界)嘅決定會導致點樣嘅未來出現，對比原版今次Reimagined收集石板碎片嘅流程可以話簡單得多，更有明確指示講到明塊碎片喺邊，基本上跟住主線流程就點到揾倒，各位玩過原版嘅玩家就唔使擔心。好易卡關去唔倒下一個世界。呢款遊戲嘅遇敵方式採用近年常見嘅明雷系統，喺進入戰鬥前先對敵人發動攻擊，就可以獲得戰鬥上嘅優勢，而當角色等級高於敵人等級，戰鬥前發動攻擊就可以直接擊殺敵人，今次Reimagined喺地圖上仲新增咗類似精英怪嘅敵人，只要打敗呢啲敵人就可以獲得怪物之心，為角色帶嚟唔同輔助效果。遊戲嘅戰鬥系統都係傳統嘅回合制戰鬥系統，不過玩家可以自行調配戰鬥嘅節奏速度，遊戲前期玩家就可以為角色轉職，當幾個特定嘅職業去到最高嘅級別，就可以轉職為高階職業，中後期角色更有兼職嘅出現，可以同時身兼兩個職業，令到玩家為角色技能搭配以及策略性層面上，有更多一層嘅思考空間。除咗戰鬥之外，呢款遊戲仲有少量解謎嘅部分等住玩家去挑戰，不過呢啲解謎嘅部分都相對簡單，唔會話好複雜。大家熟悉嘅小徽章依舊有得收集，今次仲有個幾貼心嘅設計，遊戲有一本小徽章手冊，講到明邊個區域會有徽章，等到玩家可以更易搵到。今次新增嘅翻牌遊戲「幸運面板」都幾好玩，不過個人都係鍾意賭場多啲。 今次Reimagined以現代技術完全重製，畫面真係靚咗好多，人偶風嘅美術風格結合鳥山明嘅畫風，真係有種耳目一新嘅感覺，而且製作團隊真係先製作咗主角群嘅人偶，加以掃描後先製作成我哋見到嘅遊戲角色，難怪遊戲中嘅角色都咁有質感。呢款遊戲每一張地圖都充滿特色，令人印象深刻，例如主角們嘅故鄉艾斯塔德島、鑽研機械科技嘅佛羅多城、提供轉職嘅達瑪神殿、女王帶領嘅沙漠王國、魔法之國馬德拉斯、利法族聚居嘅聖風之谷等等。DQ7採用俯視式半固定視角，初頭玩落真係唔慣，但慢慢玩落就會明白點解要咁樣設計。系列唔少熟悉嘅系列配樂都好正，重新演繹後仲係咁好聽。 總括嚟講，呢款遊戲真係好正，不論劇情定係角色都好吸引，傳統嘅回合製戰鬥系統配搭上轉職+兼職系統，感覺真係好好玩，收集地圖石板嘅過程都幾有趣，解謎部分相對簡單唔會話好困難，人偶風美術風格配搭上鳥山明嘅畫風真係好正，椙山浩一嘅唔少經典系列配樂都係咁好聽，呢款遊戲我相當推薦，DQ系列嘅粉絲唔好錯過。有鑑於七代重製版嘅表現咁成功，期望將來其他集數嘅重製版都可以用呢種方式重製啦。